ოკუპირებულ ცხინვალში ამტკიცებენ, რომ ყველა კოვიდინფიცირებული პაციენტი გამოჯანმრთელდა

ცხინვალი

ოკუპირებული ცხინვალის რეგიონის დე ფაქტო ხელისუფლების მტკიცებით, კორონავირუსით ინფიცირებული ყველა პაციენტი გამოჯანმრთელდა. როგორც მათი პროსახელისუფლებო გამოცემა წერს, 85-ვე ინფიცირებული პაციენტი გაწერეს, ახალი შემთხვევა კი არ დაფიქსირებულა. უცნობია რამდენად ზუსტია ეს მონაცემები, რადგან საქართველოს ცენტრალურ ხელისუფლებას ოკუპირებულ რეგიონიდან ზუსტი ინფორმაცია არ აქვს.

დე ფაქტო რესპუბლიკის ინფორმაციით, კორონავირუსით ინფიცირების პირველი შემთხვევა 5 მაისს დაფიქსირდა. მათივე თქმით, დაკვირვების ქვეშ არის 236 ადამიანი, აქედან სტაციონარშია 159.

ოკუპირებულ რეგიონში დაფიქსირებული შემთხვევების აბსოლუტური უმრავლესობა რუსეთს უკავშირდებოდა. მას შემდეგ, რაც პანდემია გამოცხადდა საქართველოს ორივე ოკუპირებული რეგიონის დე ფაქტო მმართველებმა ე.წ. საზღვრები ჩაკეტეს თითქმის ყველასთვის, რუსეთის გარდა.

დაწერე კომენტარი